އެއްގަމު ދަތުރުފަތުރުގެ އައު ޤާނޫނު ބައްޓަންކުރީ ކުރީގެ ތަޖުރިބާއަށް ބިނާކޮށް ކަމަށް ރައީސް ވިދާޅުވެއްޖެ

މާލެ ސަރަހައްދުގެ ޓްރެފިކާ ގުޅޭ ޒިންމާތައް ހިންގުމަށް ވަކި އޮފީހެއް ޤާއިމުކުރާ ގޮތަށް އެއްގަމު ދަތުރުފަތުރުގެ ޤާނޫނު އެކުލަވައިލީ އެކި މަޤާމުތަކުގައި ހޭދަކުރެއްވި ދިގު މުއްދަތުގައި ލިބިވަޑައިގެންނެވި ތަޖުރިބާގެ މައްޗަށް ބިނާކޮށް ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

އެ ޤާނޫނާއެކު ޖުމްލަ ހަތް ބިލެއް ތަޞްދީޤުކުރެއްވުމަށް ރައީސް އޮފީހުގައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ޤާނޫނުގެ ދަށުން އުފައްދާ އައު އޮފީހަށް ފުޅާ ބާރުތަކާއި ޒިންމާތައް ލިބިގެންދާނެ ކަމަށެވެ. އެ ނިންމެވުމަކީ ވަރަށް ގިނަ އަހަރުތަކެއްގެ ތަޖުރިބާގެ ނަތީޖާ ކަމަށް ވެސް އެމަނިކުފާނު ވިދާޅުވިއެވެ.

"މިއީ ދެން ވަރަށް ގިނަ އަހަރުގެ ތަޖުރިބާއިން އަޅުގަނޑުމެން ކުރި ކަމެއް. އަޅުގަނޑު އެކި ފަހަރު މަތިން އެ ކި ހައިސިއްޔަތުން ކުރީގައި މާލޭގެ މި ޓްރެފިކް މައްސަލައާއި މަގުތަކާ ގުޅޭ ކަންކަމުގައި މަސައްކަތް ކުރިން. އެ ކަންކަމުގެ ތަޖުރިބާގެ އަލީގައި މި އިސްލާހު މި ގެނައީ" ރައީސް ވިދާޅުވިއެވެ.

މީގެ އިތުރުން މި ޤާނޫނުގެ ސަބަބުން ރައްޔިތުންނަށް ބޮޑު ރައްކާތެރިކަމެއް ލިބޭނެ ކަމަށް ވެސް އެމަނިކުފާނު ފާހަގަކުރެއްވިއެވެ.

ސަރުކާރުގެ ފަރާތުން ކުރެންދޫ ދާއިރާގެ މެންބަރު މުޙައްމަދު ޝާމިން ޙަބީބް ހުށަހެޅުއްވި މި ބިލު މަޖިލީހުން ފާސްކުރީ ވޯޓުގައި ބައިވެރިވެވަޑައިގެންނެވި 59 މެންބަރުންގެ ތެރެއިން 47 މެންބަރުންގެ ތާއީދާ އެކުގައެވެ. ބިލާ ދެކޮޅަށް ވޯޓު ދެއްވީ އެމްޑީޕީގެ 12 މެންބަރުންނެވެ. ހަތް ބާބެއްގެ މައްޗަށް ހުށަހެޅި ބިލަށް ކޮމިޓީ މަރުޙަލާގައި "މާލެ ސަރަހައްދަށް ހިނގާ ހާއްސަ އުސޫލު" ގެ ނަމުގައި އަށްވަނަ ބާބެއް އިތުރުކޮށްފައިވެއެވެ. އެ ބާބު ހިމެނީ މާލެ ސަރަހައްދުގައި އާބާދީ ބޮޑުވެ އުޅަނދުތައް ގިނަވުމުން ޓްރެފިކް މެނޭޖްކުރުމަށް ދިމާވެފައިވާ ދަތިތައް ޙައްލުކުރުމުގެ ބޭނުމުގައެވެ.

ޤާނޫނުގެ ދަށުން "ގްރޭޓާ މާލެ ޓްރާންސްޕޯޓް އެންޑް މޯބިލިޓީ އޮފީސް" ގެ ނަމުގައި ވަކި އޮފީހެއް އުފައްދައި އެ އޮފީހަށް ގަވާއިދު ހެދުމުގެ ބާރު ވެސް ލިބިގެންދާނެއެވެ. މާލެ ސަރަހައްދާ ބެހޭ ޚާއްޞަ ބާބު ހެދީ ތިން އަހަރުގެ ތެރޭގައި އުވިގެންދާ (ސަންސެޓް) ބާބެއްގެ ގޮތުގައެވެ. ނަމަވެސް އެ މުއްދަތުގައި ބާބުގެ މަޤުޞަދު ޙާޞިލު ނުވެއްޖެ ނަމަ ނެޝަނަލް ރޯޑް ސޭފްޓީ ކައުންސިލަށް ހުށަހަޅައިގެން މުއްދަތު ދެމިގެންދާ ގޮތަށް ބިލުގައި ކަނޑައަޅާފައިވެއެވެ.

މި އައު އޮފީހަށް މިހާރު މާލޭ ސިޓީ ކައުންސިލްގެ ދަށުގައި ހުރި ގިނަ ޒިންމާތަކާއި އެ ކަންކަމާ ގުޅޭ އާމްދަނީ ބަދަލުކުރާ ގޮތަށް ބިލުގައި އޮތުމުން ކޮމިޓީ ރިޕޯޓުގެ ބަހުސް މަރުޙަލާގައި އެމްޑީޕީގެ މެންބަރުން ވަނީ ނުރުހުން ފާޅުކުރައްވައިފައެވެ.