ސިޔާސީ ފިކުރު ކުރިއެރުވުމަށް ކައުންސިލްގެ ބިމާއި މުދާ ބޭނުންނުކުރުމަށް އެލްޖީއޭއިން އެދިއްޖެ

ވަކި ސިޔާސީ ފިކުރެއް ޕްރޮމޯޓު ކުރުމުގެ ގޮތުން ކައުންސިލް އިދާރާތަކުގެ ބިންތަކާއި މުދާ ބޭނުންކުރުމަކީ ލާމަރުކަޒީ ޤާނޫނާ ޚިލާފު ކަމެއް ކަމަށް ބުނެ، އެކަން ހުއްޓައިލުމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން ކައުންސިލްތަކަށް އެދިއްޖެއެވެ.

އެލްޖީއޭގެ ސީއީއޯ މުޙައްމަދު ނިމާލް ސޮއިކުރައްވައި ސިޓީ ކައުންސިލްތަކާއި ރަށު ކައުންސިލްތަކުގެ ރައީސުންނަށް ފޮނުއްވި ސިޓީގައި ބަޔާންކޮށްފައިވާ ގޮތުގައި، ކައުންސިލްތަކުގެ ބެލުމުގެ ދަށުގައި ހުންނަ ވަސީލަތްތައް ހޭދަކުރަންވާނީ ޤާނޫނުން އެ އިދާރާތަކާ ހަވާލުކޮށްފައިވާ ޒިންމާތައް އަދާކުރުމަށް އެކަނި ކަމަށެވެ. އެ ސިޓީގައި އިތުރަށް ފާހަގަކޮށްފައިވާ ގޮތުގައި، ޚިދުމަތް ފޯރުކޮށްދިނުމުގައި އެއްވެސް ފަރާތެއް ނިސްބަތްވާ ކުލައަށް ނުވަތަ ޢާއިލާއަށް ނުބަލައި ހަމަހަމަ އުސޫލެއް ގެންގެންދިއުން ޤާނޫނުން ލާޒިމުކޮށްފައިވެއެވެ.

ކައުންސިލް އިދާރާގެ ގޯތިތެރެއާއި ޢާންމު ޚިދުމަތްތަކަށް ޚާއްޞަ ބިންތައް ސިޔާސީ ޕާޓީއެއްގެ ފިކުރު ފެތުރުމަށް ބޭނުންކުރުމަކީ ޤާނޫނާ ޚިލާފު ޢަމަލެއް ކަމަށާއި، އެފަދަ ކަންކަމަކީ ކައުންސިލަރުންގެ ސުލޫކީ މިންގަނޑާ ވެސް ފުށުއަރާ ކަމެއް ކަމުގައި އެ އޮތޯރިޓީން ދެކޭ ކަމަށް ސިޓީގައި ބަޔާންކޮށްފައިވެއެވެ.

"ކައުންސިލް އިދާރާއަކީ ރައްޔިތުން ހިދުމަތް ހޯދުމަށް އަންނަ މުހިއްމު އިދާރާއެއްކަމުން އެފަދަ ތަންތަނުގައި ސިޔާސީ ހަރަކާތްތައް ހިންގުމަކީ ރައްޔިތުންގެ ހިތުގައި ނުތަނަވަސްކަން އުފެދިގެންދާނެ ކަމެއް ކަމުގައި ވެސް ދެކެމެވެ. ކައުންސިލްތަކަކީ ލާމަރުކަޒީ އުސޫލުން ދައުލަތުގެ ހިދުމަތްތައް ދިނުމަށް ގާނޫނުން ގާއިމްކޮށްފައިވާ ފަށަލައަކަށްވާއިރު ކައުންސިލުން ފޯރުކޮށްދޭ ހިދުމަތްތައް ދިނުމުގައި ސިޔާސީ ފިކުރެއް ޕްރޮމޯޓުނުވާނެހެން ކައުންސިލްތައް އަމަލުކުރުމަކީ މި ނިޒާމަށް ރައްޔިތުން ކޮށްފައިވާ އިތުބާރު ގެއްލޭނެ އަމަލެއްކަމުގައި މި އޮތޯރިޓީން ދެކެމެވެ." ކަމަށް އެލްޖީއޭގެ ސިޓީގައި ބުނެފައިވެއެވެ.

އެލްޖީއޭއިން މި އެންގުން އައިސްފައިވާއިރު، މިމަހުގެ 1 އިން 3 އަށް ބޭއްވި އެމްޑީޕީގެ ކޮންގްރެސް ކުރިއަށް ގެންގޮސްފައިވަނީ މާލެ ސިޓީ ކައުންސިލްގެ ހޯލުގައެވެ. އެ ޕާޓީން ބުނެފައިވާ ގޮތުގައި އެ ތަނުގައި ކޮންގްރެސް ބާއްވަން ޖެހުނީ އެހެން ތަނެއް ލިބެން ނެތުމުންނެވެ.