ފުވައްމުލައް ސިޓީގައި އިމާރާތްކުރި ޤުރުއާން މަރުކަޒު ހުޅުވަން ތައްޔާރުވެއްޖެ

ސަރުކާރުގެ ހަރަދުގައި ފުވައްމުލައް ސިޓީގައި އިމާރާތްކުރި ޤުރުއާން މަރުކަޒު އނަްނަ ހުކުރުދުވަހު ހުޅުވުމަށް ނިންމާފައިވާކަމަށް އިސްލާމިކް މިނިސްޓްރީން ބުނެފިއެވެ.

އިސްލާމިކް މިނިސްޓަރު ޑރ.މުހައްމަދު ޝަހީމް މިއަދު ވިދާޅުވީ، ފުވައްމުލައް ސިޓީގައި އިމާރާތްކުރި ޤުރުއާން މަރުކަޒުގެ މަސައްކަތް ނިމި ހުޅުވުމަށް ތައްޔާރުވަމުންދާކަމަށެވެ. މިނިސްޓަރު ޝަހީމް ވިދާޅުވީ، މަރުކަޒު ރަސްމީކޮށް ހުޅުވުމަށް ނިންމާފައިވަނީ އަންނަ ހުކުރުދުވަހުގެ 16:30 ގައި ކަމަށެވެ. މަރުކަޒު ހުޅުވުމާއެކު އެތަނުގައި ޤުރުއާން ހިފްޒުކުރުމުގެ ޕްރޮގްރާމްތައް ފުވައްމުލައް ސިޓީގައި އިތުރުކުރާނޭކަމަށް މިނިސްޓަރު ވިދާޅުވިއެވެ. އަދި މުދައްރިސުންވެސް އިތުރުކުރުމަށް ވަނީ ނިންމާފައެވެ.

ފުވައްމުލައް ސިޓީގައި އިސްލާމިކް މިނިސްޓްރީން ކުރިއަށް ގެންދިއުމަށް ނިންމާފައިވާ އިތުރު މަޝްރޫޢުތަކުގެ ތެރޭގައި ދެން އެންމެ ފާަހަގަކޮށްލެވެނީ އިސްލާމިކް ސެންޓަރުގެ މަސައްކަތެވެ. މިނިސްޓަރު ވިދާޅުވީ އިސްލާމިކް ސެންޓަރ ޑިޒައިންކުރުމުގެ މަސައްކަތް ނިމިފައިވާކަމަށެވެ. އަދި ޑިޒައިނާމެދު ފުވައްމުލައް ސިޓީ ކައުންސިލުން ދެކޭގޮތް ބެލުމަށް ލިޔުމުން އެކަން ފޮނުވާފައިވާކަން މިނިސްޓަރު ފާހަގަކުރެއްވިއެވެ.

އިސްލާމިކް ސެންޓަރު ނިމުމުން އެތަން ބަދަލުކުރުމަށް ނިންމާފައިވަނީ ގުރުއާން މަރުކަޒަށެވެ. އަދި އެއަށްފަހު ޤުރުއާން މަރުކަޒު ބަދަލުވެގެންދާނީ ވަގްފް އިމާރާތަކަށެވެ. އަދި އެ މަރުކަޒުން ލިބޭ ފައިސާ ފުވައްމުލައް ސިޓީގެ ދީނީ ކަންކަމަށް ހަރަދު ކުރެވިގެންދާނެކަމަށްވެސް މިނިސްޓަރު ފާހަގަކުރެއްވިއެވެ.