އެތްލެޓިކޯ ސަޕޯޓަރުންގެ ނުރުހުމާ ހެދި އަލްވަރޭޒް އެކަހެރިކޮށް ޗޭންޖިން ރޫމަށް ފޮނުވައިފި

ވިޔަރެއާލްއާ ދެކޮޅަށް ކުޅެ އެއްވަރުވި މެޗުގައި ބާސެލޯނާއަށް ބަދަލުވާން މަސައްކަތްކުރާ ފޯވަޑް ހޫލިއަން އަލްވަރޭޒަށް އެތްލެޓިކޯ މެޑްރިޑުގެ ސަޕޯޓަރުން ވަރަށް ބޮޑަށް ނުރުހުން ފާޅުކުރުމާ ގުޅިގެން ކުލަބުގެ ނިންމުމަކުން އޭނާ ވަކިން ޗޭންޖިން ރޫމަށް ފޮނުވައިފިއެވެ.

މެޗުގެ ފަހު 25 މިނެޓަށް ދަނޑަށް ނުކުތް އާޖެންޓީނާގެ ފޯވަޑާ ދެކޮޅަށް ވާމްއަޕް ކުރަމުން ދިޔައިރުން ފެށިގެން ސަޕޯޓަރުން ދިޔައީ މަލާމާތާ އެކު ހަޅޭއްލަވަމުންނެވެ. އެތްލެޓިކޯގެ ޕްރެކްޓިސް ދަނޑު ވަށައިގެން އޭނާއާ ދެކޮޅު ބެނާތައް ވެސް ދެމިފައި ހުއްޓެވެ. އެ ބެނާތަކުގެ ތެރެއިން ބެނާއެއްގައި "އަލްވަރޭޒް މިހާރު މި ކުލަބުން ދޭ" މިހެން ލިޔެފައިވެއެވެ.

ވާދަވެރި ބާސެލޯނާއަށް ބަދަލުވުމަށް އަލްވަރޭޒް މަސައްކަތް ކުރާތީ ސަޕޯޓަރުންގެ ރުޅި އޭނާއަށް އަމާޒުވީއެވެ. މެޗު ނިމުމުން އެހެން ކުޅުންތެރިން ދަނޑުމަތީގައި ސަޕޯޓަރުންނާ ބައްދަލުކޮށް ޝުކުރު އަދާކުރަމުން ދިޔައިރު އަލްވަރޭޒް ސީދާ ޗޭންޖިން ރޫމަށް ފޮނުވައިލީ ކުލަބުގެ ނިންމުމަކުން ކަމަށް ކޯޗު ޑިއެގޯ ސިމިއޯނޭ ބުންޏެވެ.

"އޭނާ ބޭނުންވަނީ ބާސެލޯނާ އަށް ދާން ކަމަށް ވަންޏާ އެކަމާ ސަޕޯޓަރުން ހިތްހަމަ ނުޖެހުން ފާޅު ކުރާނެ. އެގޮތުން އައި ހިތްހަމަ ނުޖެހުންތަކެއް އެއީ. ކުލަބުން ނިންމީ ސަޕޯޓަރުންނާ ޝުކުރު އަދާކުރަން ދަނޑުމަތީގައި ހުރުމުގެ ބަދަލުގައި އަލްވަރޭޒް ޗޭންޖިން ރޫމަށް ދާން. އެއީ އެންމެ ރަނގަޅި ގޮތް ކަމަށް ނިންމީ ކުލަބުން" ސިމިއޯނޭ ބުންޏެވެ.

ސަޕޯޓަރުން ކުޅުންތެރިއަކަށް ފާޅުގައި މަލާމާތްކުރުމަށް ތާއީދުކުރަންތޯ ކުރެވުނު ސުވާލަށް ސީދާ ޖަވާބެއް ނުދީ ސިމިއޯނޭ ބުނީ ތާއީދުކުރަނީ ސަޕޯޓަރުންގެ ރޫހަށް ކަމަށެވެ. އެތްލެޓިކޯގެ މިޑްފީލްޑަރު ކޯކޭ ވެސް މި މައްސަލައާ ގުޅޭ ގޮތުން ވާހަކަ ދެއްކިއެވެ.

"އޭނާއާ މެދު އަހަރެން ދެރަވަން. ވަރަށް އުނދަގޫ ފައްތަރެއްގައި އޭނާ އެހުރީ. ބާސެލޯނާ އަށް ދާން އޭނާ ބޭނުންވާނަމަ އެކަމަށް ސަޕޯޓަރުން ހިތްހަމަ ނުޖެހޭނެ. އަހަރުމެންގެ ވާދަވެރި ކުލަބެއް އެއީ. އެތްލެޓިކޯގައި ވެސް އުސޫލުތަކެއް ހުންނާނެ. އަހަރުމެން އެކަންކަމަށް އިހްތިރާމް ވެސް ކުރަންވާނެ" ކޯކޭ ބުންޏެވެ.

އެތްލެޓިކޯއިން ނިންމާފައި އޮތީ ބާސެލޯނާ ފިޔަވައި އެހެން ކޮންމެ ކުލަބަކަށް ވެސް އަލްވަރޭޒް ދޫކޮށްލެވިދާނެ ކަމަށެވެ. އެހެން ނަމަވެސް އަލްވަރޭޒް ދާން ބޭނުންވާ ހަމައެކަނި މަންޒިލަކީ ބާސެލޯނާ ކަމަށް ވުމުން މި މައްސަލައަށް ހައްލެއް ލިބޭނެ ގޮތެއް އަދި ސާފެއް ނުވެއެވެ.