އައްޑޫ އާއި ފުވައްމުލަކުގެ ފެނާއި ނަރުދަމާގެ ވަސީލަތްތައް އެމްޑަބްލިޔުއެސްސީއާ ހަވާލުކޮށް ނިންމައިފި

ފެނަކަ ކޯޕަރޭޝަނުން އައްޑޫ ސިޓީ އާއި ފުވައްމުލައް ސިޓީގައި ފެނާއި ނަރުދަމާގެ ޚިދުމަތް ދިނުމަށް ބޭނުންކުރަމުން ދިޔަ އެންމެހައި ވަސީލަތްތައް މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އާ ހަވާލުކޮށް ނިންމައިފިއެވެ.

އެމްޑަބްލިޔުއެސްސީގެ މެނޭޖިން ޑިރެކްޓަރު ޙުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ރައީސް ޑރ. މުޙައްމަދު މުޢިއްޒުގެ ކޯޕަރޭޓް ދާއިރާ އިޞްލާޙުކުރެއްވުމުގެ ސިޔާސަތުގެ ދަށުން ހިންގުނު މުހިންމު މަސައްކަތެއް ކަމަށެވެ. ދެ ސިޓީގެ ފެނާއި ނަރުދަމާ ނިޒާމާ ގުޅޭ ހުރިހާ ވަސީލަތެއް މިހާރު ޤައުމީ ފެން ކުންފުންޏާ ރަސްމީކޮށް ހަވާލުކޮށް ނިމިފައިވާ ކަމަށް އެ މަނިކުފާނު ވިދާޅުވިއެވެ.

ފުވައްމުލައް ސިޓީގެ ފެނާއި ނަރުދަމާގެ ޚިދުމަތްތައް އެމްޑަބްލިޔުއެސްސީއާ ރަސްމީކޮށް ހަވާލުކުރީ މިދިޔަ ބުރާސްފަތި ދުވަހުއެވެ. މި ބަދަލު ގެނައުމަށް ދެ ކުންފުނީގެ ދެމެދުގައި ޚާއްޞަ ފްރޭމްވޯކް އެއްބަސްވުމެއް އެކުލަވައިލައި ސޮއިކޮށްފައިވެއެވެ. އެ އެއްބަސްވުމުގެ ދަށުން ދެ ސިޓީގެ އިންފްރާސްޓްރަކްޗަރު ބަދަލުކުރުމުގެ މަސައްކަތް މިހާރު ވަނީ އެއްކޮށް ނިމިފައެވެ.

އެމްޑަބްލިޔުއެސްސީން ބުނީ، ދެ ސިޓީގެ ނިޒާމުތައް އިތުރަށް ހަރުދަނާކޮށް، ރައްޔިތުންނަށް މެދުކެނޑުމެއް ނެތި ފެންވަރު ރަނގަޅު ޚިދުމަތެއް ފޯރުކޮށްދިނުމުގެ މަސައްކަތް ކުރިއަށްދާ ކަމަށެވެ. ފަންނީ އެސެސްމަންޓްތަކަށް ބިނާކޮށް، ޚިދުމަތުގެ ފެންވަރު މަތިކުރުމާއި ހިންގުން ހަރުދަނާކުރުމުގެ ޢަމަލީ މަސައްކަތްތައް މިހާރު ވެސް ބާރަށް ކުރިއަށްދާ ކަމަށް އެ ކުންފުނިން ބުނެއެވެ.