އަމީނީ މަގުގެ ދެ ސެގްމަންޓެއް މަރާމާތުކޮށް ނިންމައި ދަތުރުފަތުރަށް ހުޅުވާލައިފި

އެމްޓީސީސީއާ ހަވާލުކޮށްގެން އަމީނީ މަގުގެ ހަލާކުވެފައި އޮތް ދެ ސެގްމަންޓެއްގެ ތާރު އަލުން އެޅުމުގެ މަސައްކަތް ނިންމައި، ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވުޒާރާއިން އެ ސަރަޙައްދު ޢާންމު ދަތުރުފަތުރަށް ހުޅުވާލައިފިއެވެ.

ޖޫން 15 ވަނަ ދުވަހު ފެށި މި މަޝްރޫޢުގެ ފުރަތަމަ ސެގްމަންޓުގައި ދިވެހިރާއްޖޭގެ އަޑުން ދަރުމަވަންތަ ހޮސްޕިޓަލާ ދެމެދު 2794.062 އަކަމީޓަރުގެ ސަރަޙައްދެއްގެ ތާރުގަނޑު އެއްކޮށް ނަގައި، ސަބްގްރޭޑާއި ސަބްބޭސް އެޅުމަށްފަހު އެގްރިގޭޓް ބޭސް ކޯސް (އޭބީސީ) އާއި ތާރު އަޅައި ނިންމައިފައިވެއެވެ. ދެވަނަ ސެގްމަންޓުގެ ދަށުން ދިވެހިރާއްޖޭގެ އަޑު ކުރިމަތީ ހަތަރުއަނގޮޅީގެ 133.64 އަކަމީޓަރުގެ ސަރަޙައްދެއްގައި ކުރީގެ ތާރު ނަގައި އޭބީސީއާ ތާރު އަލުން އަޅައިފައިވެއެވެ.

ދެން ފެށުމަށް ހަމަޖެހިފައި އޮތީ އިއްޒުއްދީން މަގާ ހިސާބުން ކޯރުކެނޑި ހިނގުމާ ދެމެދު އޮންނަ ތިންވަނަ ސެގްމަންޓުގެ މަސައްކަތެވެ. އާދީއްތަ ދުވަހު އެ މަސައްކަތް ފެށުމަށް ތައްޔާރުވެފައިވާތީ، މިރޭ ދަންވަރު 12:00 އިން ފެށިގެން އެ ސަރަޙައްދުގެ ޓްރެފިކް ބަދަލުކުރުމަށާއި ޕާކްކޮށްފައިވާ އުޅަނދުތައް ނެގުމަށް ފުލުހުން ވަނީ އަންގައިފައެވެ. ތިންވަނަ ސެގްމަންޓުގައި 1924.77 އަކަމީޓަރުގެ ތާރުގަނޑު ބަދަލުކޮށް މަގުމަތީ ނިޝާންތައް ކުރެހުން ހިމެނޭ ކަމަށް އެމްޓީސީސީން ބުނެފައިވެއެވެ. އޭގެ އިތުރުން ކޯރުކެނޑި ހިނގުމުން ޣިޔާސުއްދީން އިންޓަރނޭޝަނަލް ސްކޫލާ ހަމައަށް ހިމެނޭ ހަތަރުވަނަ ސެގްމަންޓުގައި 1148.91 އަކަމީޓަރުގެ ސަރަޙައްދެއް ހަމަ އެ ގޮތަށް މަރާމާތުކުރުމަށް ރާވައިފައިވާ ކަމަށް ވެސް އެ ކުންފުނިން ހާމަކޮށްފައިވެއެވެ.

އަމީނީ މަގުގެ މާފަންނާވީ ފަޅީގެ ތާރުގަނޑު ބޮޑަށް ހަލާކުވެ ވަޅުގަނޑުތައް ހެދެމުންދާތީ، ބަހާއި ހެވީ ވެހިކަލް ދުއްވާ އެ ސަރަޙައްދުގައި ދަތުރުފަތުރަށް ބޮޑެތި ދަތިތައް ކުރިމަތިވެގެން މި މަރާމާތު ފެށީ ކަމަށް އެ ވުޒާރާއިން ބުނެފައިވެއެވެ. މީގެ އިތުރުން މާލޭގެ ހުޅަނގު ކޮޅުން ބޮޑުތަކުރުފާނު މަގު ޒަމާނީ ފެންވަރަށް ތަރައްޤީ ކުރުމުގެ މަޝްރޫޢު ފެށުމަށް ތައްޔާރުވަމުންދާއިރު، ވެސްޓް ޕާކް ސަރަޙައްދުން ބައެއް ފެން ހިންދާ ނިޒާމުގެ މަސައްކަތަށް މިހާރު ވަނީ ބަންދުކޮށްފައެވެ. ހެންވޭރު ފެރީ ޓަރމިނަލުން ނޯތް ހާބަރާ ދެމެދު އޮތް ސަރަޙައްދު އެ މަޝްރޫޢުގެ ދަށުން ތަރައްޤީކޮށް ނިންމައި، އެ ހިސާބުގެ ތޮއްޖެހުމަށް ލުއި ލިބިފައިވާ ކަމަށް ވެސް އެ ވުޒާރާއިން ހާމަކޮށްފައިވެއެވެ.