ޔަޒްމީދު މުޙައްމަދު ޕެންޝަން އޮފީހުގެ ސީއީއޯ ކަމަށް އައްޔަންކުރައްވައިފި

ޖުޑީޝަލް ސާވިސް ކޮމިޝަން (ޖޭއެސްސީ) ގެ ނައިބު ރައީސްކަން ކުރީން ފުރުއްވި ޔަޒްމީދު މުޙައްމަދު ފަސް އަހަރުގެ ދައުރަކަށް ޕެންޝަން އޮފީހުގެ ޗީފް އެގްޒެކެޓިވް އޮފިސަރުގެ މަޤާމަށް މިއަދު އައްޔަންކުރައްވައިފިއެވެ.

އެ އޮފީހުން ހާމަކުރި ގޮތުގައި އަންނަ އާދީއްތަ ދުވަހު ޔަޒްމީދު މަޤާމުގެ މަސްއޫލިއްޔަތާ ރަސްމީކޮށް ހަވާލުވެވަޑައިގަންނަވާނެއެވެ. ދައުލަތުގެ އެކި މުއައްސަސާތަކާއި އަމިއްލަ ވިޔަފާރީގެ ދާއިރާގައި 20 އަހަރަށް ވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ޔަޒްމީދު ވަނީ އެންޓި ކޮރަޕްޝަން ކޮމިޝަންގެ މެންބަރުކަމާއި އޮޑިޓް އޮފީހުގެ މެނޭޖަރުކަން ވެސް އަދާކުރައްވައިފައެވެ.

ތަޢުލީމީ ގޮތުން ބަލާއިރު މެލޭޝިއާގެ އޯޕަން ޔުނިވާސިޓީން ހިންގުމުގެ ދާއިރާއިން މާސްޓާސް ޑިގްރީ ޙާޞިލުކުރައްވައި އޮކްސްފޯޑް ބްރޫކްސް ޔުނިވާސިޓީން އެކައުންޓިންގެ ދާއިރާއިން ފަސްޓް ކްލާސް އޮނާސް ޑިގްރީ ހޯއްދަވާފައިވާ ޔަޒްމީދަކީ އޭސީސީއޭ ފުރިހަމަކުރައްވާފައިވާ ޗާޓާޑް އެކައުންޓެންޓެކެވެ.

ޕެންޝަން އޮފީހުން ބުނީ "އާ ސީއީއޯއާ އެކު އެ އޮފީހުގެ އިދާރީ ހިންގުމުގެ ނިޒާމު އިތުރަށް ފުރިހަމަވާނެ ކަމަށް އުއްމީދުކޮށް ރާއްޖޭގައި ހަރުދަނާ އަދި ދެމެހެއްޓެނިވި ޕެންޝަން ނިޒާމެއް ގާއިމުކުރުމަށް ކުރާ މަސައްކަތްތަކަށް އިތުރު ކުރިއެރުންތައް ލިބޭނެ" ކަމަށެވެ.

ޕެންޝަން އޮފީހުގެ ސީއީއޯގެ މަޤާމު ހުސްވީ ކުރީން އެ މަޤާމުގައި ހުންނެވި ޝުޖާތާ ޙަލީމް މިދިޔަ ފެބްރުއަރީ މަހު އިސްތިޢުފާ ދެއްވުމުންނެވެ. ޝުޖާތާ އެ ނިންމެވުން ނިންމެވީ ޕެންޝަން އޮފީހުން ސަރުކާރަށް ވިއްކި 2.4 ބިލިއަން ރުފިޔާގެ ބޮންޑެއްގައި އިންވެސްޓު ކުރި މައްސަލައާ ގުޅިގެން އިޤުތިޞާދީ ދާއިރާގެ ގިނަ ބައެއްގެ ފާޑުކިޔުން އަމާޒުވެފައި އޮތް ދަނޑިވަޅެއްގައެވެ. ޔަޒްމީދު މަޤާމާ ހަވާލުވެވަޑައިގަންނަވާނީ އަންނަ އާދީއްތަ ދުވަހުއެވެ.