ކޮންމެ ކާމިޔާބީއެއްގެ ފަހަތުގައިވެސް އޮންނާނީ އުންމީދުން ފުރިގެންވާ ހުވަފެންތަކެކެވެ. މީގެ އަހަރުތަކެއް ކުރިން، ކުޑަ އަންހެން ކުއްޖަކު އޭނާގެ ބައްޕަގެ ގަމީސްލައި، ޓައީ އަޅައިގެން ލޯގަނޑު ކުރިމަތީގައި ހުރެ ޚަބަރު ކިޔަން ދަސްކުރި ހިނދު، އެއީ މިއަދު ދިވެހިރާއްޖޭގެ ރޭޑިއޯގެ އުދަރެހުން ފެންނަން އޮތް ފާހަގަކޮށްލެވޭ ތަރިއަކަށް ވެދާނެ ކަމަކަށް އެކަކުވެސް ހީއެއް ނުކުރާނެއެވެ. ނަމަވެސް، އެ ކުޑަކުޑަ ކޮޓަރީގެ ތެރެއިން ފެށުނު އުންމީދުގެ ދަތުރު، މިއަދު މިވަނީ ރާއްޖޭގެ އެންމެ ބޮޑު ރޭޑިއޯ ޕްރެޒެންޓިންގ މުބާރާތުގެ ގަދަ އަށް ބައިވެރިންގެ ތެރެއަށް އައިސްފައެވެ.

އެ ކުޑަ ކޮޓަރީގައި އެ ހުވަފެން ދެކެމުންއައި ކުއްޖާއަކީ މިއަދު ޕަބްލިކް ސާވިސް މީޑިއާ (ޕީއެސްއެމް) ގެ ދިވެހިރާއްޖޭގެ އަޑުން އިންތިޒާމު ކޮށްގެން ކުރިއަށްގެންދާ "ބެސްޓް ރޭޑިއޯ ޕްރެޒެންޓަރ ކޮންޕެޓިޝަން" (ބީއާރްޕީ)ގެ އެއް ބައިވެރިއެއް ކަމަށްވާ، ރ. ފައިނަށް އުފަން ނަފްހާ ނަސީމެވެ. 

ރޭޑިއޯ ޕްރޮގްރާމް ހުށަހެޅުމުގެ ދާއިރާއަށް ޝައުޤުވެރިވާ ޒުވާނުންނަށް ޚާއްޞަކޮށްގެން ބާއްވާ މި ރިއަލިޓީ ޝޯވއަކީ، މި ދާއިރާއިން ކުރިއަށްދާން ބޭނުންވާ ފަރާތްތަކަށް ފުރުޞަތު ފަހިކޮށްދީ، ހުނަރު ތަރައްޤީ ކޮށްދިނުމުގެ މަޤްޞަދުގައި ރާއްޖޭގައި ބާއްވާ މިފަދަ އެންމެ ބޮޑު މުބާރާތެވެ.

މީހާރު ކުރިއަށްދަނީ މުބާރާތުގެ 7 ވަނަ ސީޒަނެވެ. މި ސީޒަންފެށި، ފޯރި ގަދަވެފައިވާއިރު، މިހާރު މުބާރާތުގައި ތިބީ ގަދަ 8 ބައިވެރިންނެވެ. ނަފްޙާ އަކީ އެތަނުން އެއް ބައިވެރިއެވެ. 

ކުޑަކުޑަ ހުވަފެނަކުން ފެށިގެން ގަދަ އަށަކާ ހަމައަށް

ނަފްޙާއަކީ ކުޑައިރުއްސުރެ ޕްރެޒެންޓް ކުރުމަށް ނުހަނު ލޯބިކުރި ކުއްޖެކެވެ. އޭނާ ކިޔައިދިން ގޮތުގައި، ކުޑައިރު ބައްޕަގެ ގަމީސް ލައިގެން، ޓައީ އަޅައިގެން ޚަބަރު ކިޔަން އުޅުނު ހަނދާންތަކަކީ މިއަދު މި ދާއިރާއަށް އޭނާ ނުކުތުމުގެ އަސްލެވެ.

 "މި ދާއިރާއަށް ޝައުޤުވެރިވަނީ މިއީ އެކި ކަހަލަ އާ ކަންކަން ތަޖުރިބާ ކުރެވޭނެ ދާއިރާއަކަށް ވީމާ. އަޅުގަނޑަކީ އަބަދުވެސް އާ ކަންކަން ތަޖުރިބާ ކުރަން ބޭނުންވާ މީހެއް،" ނަފްޙާ ބުންޏެވެ.

މިދިޔަ އަހަރުގެ މުބާރާތުގައިވެސް ނަފްޙާ ބައިވެރިވިއެވެ. ނަމަވެސް އެފަހަރު އޮޑިޝަނުންވެސް އޭނާ ހޮވިފައެއް ނުވެއެވެ. އެހެންކަމުން، މިއަހަރު މުބާރާތުގެ ގަދަ 8 ބައިވެރިންގެ ތެރޭގައި ހިމެނިގެން ދިޔުމަކީ ބޮޑު ކާމިޔާބީއެކެވެ. ޚާއްސަކޮށް މިދިޔަ ހަފްތާގައި، ކުރިއަށްދިޔަ އިންޓަވިޔު ރައުންޑުން އެންމެ  މޮޅު ޕްރެޒެންޓަރުގެ މަޤާމު ހޯދައި، 'ޕްރެޒެންޓާ އޮފް ދަ ވީކް' ގެ އެވޯޑް ލިބުމަކީ އޭނާއަށް ލިބުނު ބޮޑު ހިތްވަރެކެވެ. 

އުއްމީދަކީ ކާމިޔާބީ ހާސިލުކުރުން

ނަފްޙާގެ މިހާރުގެ އަމާޒަކީ މުބާރާތުގެ އެންމެ އުހަށް ދިއުމެވެ. މިއީ ކުރިން ހަމައެކަނި އޭނާގެ އަމިއްލަ ހުވަފެނަކަށް ވީނަމަވެސް، މިއަދު މިއީ އޭނާއަށް ސަޕޯޓްކުރާ ހުރިހާ އެންމެންގެވެސް ހުވަފެނެކެވެ. އެހެންކަމުން އެ އެންމެންގެ އުއްމީދުތައް ހަގީގަތަކަށް ހަދައިދިނުމަކީ ނަފްޙާގެ ވަރަށް ބޮޑު އެދުމެކެވެ. އޭނާ މިހާރު ހުރީ އެ ޢަޒުމުގައެވެ. ވަރުބަލިކަމެއް ނެތި ރެއާއި ދުވާލު މަސައްކަތް ކުރަމުންދަނީ އެކަމަށްޓަކައެވެ. އުއްމީދަކީ މުސްތަޤުބަލުގައި ޓީވީ ނުވަތަ ރޭޑިއޯގެ ކޮންމެވެސް ޕްރޮގްރާމަކުން އޭނާގެ އަޑު އިވިގެންދިއުމެވެ.

ޝުކުރުގެ ލިސްޓު ދިގު

ނަފްޙާގެ މި ދަތުރުގައި، ކުރިމަތިވަމުންދާ ގޮންޖެހުންތަކާއި، ހުރަސްތައް ގިރާކޮށް ކުރިއަށް ދިޔުމަށް ހިތްވަރު ލިބެނީ އެތައް ބައެއްގެ އެހީތެރިކަމާއި އެއްބާރުލުމުގެ ސަބަބުންނެވެ. އެގޮތުން އެންމެ ފުރަތަމަވެސް އޭނާ ފާހަގަކުރީ މަންމަ އާއި ބައްޕައަށް، އަދި ދެފަރާތުގެ އާއިލާއެވެ.

"އަޅުގަނޑަށް އެ ދޭ ހިތްވަރަށާއި ވޯޓު ހޯދައިދޭން ކުރާ މަސައްކަތަށް ވަރަށް ބޮޑަށް ޝުކުރިއްޔާ. ފައިނު ކައުންސިލަށާއި ހުރިހާ ރައްޔިތުންނަށް، އަދި ރ. އަތޮޅުގެ ހުރިހާ ރައްޔިތުންނަށްވެސް ޝުކުރު އަދާކުރަން،" ނަފްޙާ ފާހަގަކުރިއެވެ.

މީގެ އިތުރުން، ނުދަންނަ އެތައް ބަޔަކު މެސެޖުކޮށް ހިތްވަރުދީ، ވޯޓުލާކަންވެސް އޭނާ ޝުކުރުވެރިކަމާއެކު ފާހަގަކުރިއެވެ. 

އަދި ހަމައެހެންމެ އޭނާގެ ހުނަރު ތަރައްޤީކޮށްދިނުމަށް ބީއާރްޕީގެ ކޯޗުންގެ ފަރާތުން ލިބޭ ނަސޭހަތާއި، ކޮންމެ ވަގުތެއްގައިވެސް ޕްރެކްޓިސްތައް ބާއްވައިދީ ދޭ އެއްބާރުލުމަށް ނަފްޙާ ހިތުގެ އަޑިން ޝުކުރު އަދާކުރެއެވެ.

މިއަހަރުގެ ބީއާރްޕީ ސީޒަން 7 ގެ ޓައިޓަލް ކާމިޔާބު ކުރާ ފަރާތަކަށް 50,000 ރުފިޔާގެ ފައިސާގެ އިނާމާއި، އުމްރާ ދަތުރަކާއި، އެއްއަހަރު ދުވަހުގެ މުއްދަތަށް ދިވެހިރާއްޖޭގެ އަޑުގައި ޕްރެޒެންޓަރެއްގެ ގޮތުގައި މަސައްކަތް ކުރުމުގެ ފުރުސަތު ލިބިގެންދާނެއެވެ. ނަފްޙާ މިހާރު ހުރީ މި ޝަރަފުވެރި ވަނަ ހާސިލުކުރުމުގެ ވަރުގަދަ އަޒުމުގައެވެ.

އެކަމަށްޓަކައި ބެލުންތެރިންގެ އެއްބާރުލުންވެސް ވަރަށް ބޭނުންވެއެވެ. އެހެންކަމުން ނަފްޙާ އެދެނީ އޭނާގެ ހުވަފެންތައް ހަގީގަތަކަށް ހަދައިދިނުމަށް އެންމެހާ ފަރާތްތަކުން ވޯޓު ދިނުމަށެވެ. މިހާތަނަށްވެސް ދިން އެއްބާރުލުން މުބާރާތުގެ އެންމެ ފަހުވަގުތާ ޖެހެންދެންވެސް ދިނުމެވެ.