ނުރައްކާތެރިކޮށް ދުއްވުން ތަކުރާރުކުރާ މީހުންގެ ވަނަވަރު އާންމުކުރާނެ ކަމުގެ އިންޒާރު ފުލުހުން ދީފި

ނުރައްކާތެރިކޮށް އުޅަނދު ދުއްވުމުގެ ޢަމަލު ތަކުރާރުކުރާ ފަރާތްތަކުގެ ވަނަވަރު ހާމަކުރާނެ ކަމަށާއި އެ ފަރާތްތައް ނިސްބަތްވާ އިދާރާތަކަށް ވެސް އެ މަޢުލޫމާތު ފޯރުކޮށްދޭނެ ކަމަށް ފުލުހުން މިއަދު ބުނެފިއެވެ.

ފުލުހުން މިއަދު ނެރުނު ބަޔާނުގައި ބުނެފައިވާ ގޮތުގައި، މަގުމަތީގައި ނުރައްކާތެރިކޮށް ދުއްވާ ފަރާތްތައް ހުއްޓުވައި ހަރުކަށި ފިޔަވަޅު އެޅުމަށް ޚާއްޞަ މަސައްކަތްތަކެއް މިހާރު ވަނީ ފަށައިފައެވެ. އެ މަސައްކަތުގެ ތެރެއިން މިފަދަ ފަރާތްތައް ދެނެގަނެ، އެ މީހުންގެ މަޢުލޫމާތު ޕްރޮފައިލްކުރުމުގެ މަސައްކަތް ކުރިއަށް ގެންދާ ކަމަށް ފުލުހުން ބުނެފައިވެއެވެ.

ފުލުހުން ބުނެފައިވާ ގޮތުގައި، މިފަދަ ކަންކަމާ ގުޅިގެން ޢާންމުން ހިއްސާކުރާ ފޮޓޯއާއި ވީޑިއޯގެ ޞައްޙަކަން ކަށަވަރުކުރުމަށް ފަހު، ޤާނޫނީ ގޮތުން އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށެވެ. ނުރައްކާތެރިކޮށް ދުއްވާ ފަރާތްތައް ފުލުހުންގެ ޚިދުމަތަށް ހާޒިރުކޮށް ނަޞޭޙަތްތެރިވާނެ ކަމަށާއި، އެ ޢަމަލު ތަކުރާރުކުރާ ނަމަ ޓްރެފިކް ޤާނޫނުގެ ދަށުން ކުރާ ޖޫރިމަނާގެ އިތުރުން އިތުރު އިންޒާރެއް ނެތި ޖިނާއީ ތަޙުޤީޤު ހިންގާނެ ކަމަށް ވެސް އެ ބަޔާނުގައި ބުނެފައިވެއެވެ.

ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން މިފަދަ ޢަމަލުތަކުގައި ބައިވެރިވާކަން ފާހަގަކުރެވިފައިވާ ކަމަށާއި، އެ ފަރާތްތަކާ މެދު އިދާރީ ފިޔަވަޅު އެޅުމަށް ނިސްބަތްވާ މުއައްސަސާތަކަށް މަޢުލޫމާތު ހިއްސާކުރަމުންދާ ކަމަށް ވެސް ފުލުހުން ބުނެފައިވެއެވެ.