އެލްޖީއޭއިން ހޯރަފުށީ ކައުންސިލްގެ ރައީސް ތިން މަހަށް ސަސްޕެންޑުކޮށްފި

ހއ. ހޯރަފުށީ ކައުންސިލުން ޤާނޫނާއި ގަވާއިދުތަކާ ޚިލާފު އެތައް ކަމެއް ކޮށްފައިވާ ކަމަށް ފާހަގަކުރެވިގެން އެ ކައުންސިލްގެ ރައީސް މުޙައްމަދު ވަހީދު މުސާރައާއި އިނާޔަތްތައް ނުލިބޭ ގޮތަށް ތިން މަސް ދުވަހަށް ލޯކަލް ގަވަރމެންޓް އޮތޯރިޓީ (އެލްޖީއޭ) އިން މިއަދު ސަސްޕެންޑުކޮށްފިއެވެ.

އެލްޖީއޭއިން ހާމަކުރި ގޮތުގައި އެ ކައުންސިލާ ގުޅޭ ގޮތުން ހުށަހެޅުނު ޝަކުވާތަކެއް ބެލުމަށް އިންކުއަރީއެއް ހިންގައި ޖުމްލަ އަށް މައްސަލައެއް ތަޙުޤީޤުކޮށްފައިވެއެވެ. ލާމަރުކަޒީ ޤާނޫނާއި ލޯކަލް ކައުންސިލުގެ ޢާންމު އިޖުރާއީ ގަވާއިދާއި މާލިއްޔަތު ގަވާއިދާ ޚިލާފު ޢަމަލުތައް ހިންގާފައިވާކަން އެ އިންކުއަރީން ސާބިތުވިއެވެ. ކައުންސިލް ރައީސަކީ ޤާނޫނާ އެއްގޮތަށް ކައުންސިލުގެ ކަންކަން ހިންގާކަން ކަށަވަރުކުރުމުގެ އެންމެ ބޮޑު ޒިންމާ އުފުލާ ފަރާތް ކަމުން ވަހީދާ މެދު ފިޔަވަޅު އެޅީ ކަމަށް އެލްޖީއޭގެ ރިޕޯޓުގައިވެއެވެ.

ބެލި އަށް މައްސަލައިގެ ތެރޭގައި 2025 ވަނަ އަހަރުގެ ތިލަ އުތުރު އަންހެނުންގެ ވޮލީ މުބާރާތަށް މާލިއްޔަތު ގަވާއިދާ ޚިލާފަށް ޚަރަދުކުރުމާއި ގޯތިތަކާ އިންވެގެންވާ ހުސް ބިންތައް ލޭންޑް ޔޫޒް ޕްލޭނާ ޚިލާފަށް ގޯތިތަކަށް އިތުރުކޮށްދިނުމާއި 2023 ގައި ބަނދަރު ސަރަޙައްދުގައި އިންދުމަށް ކަދުރު ރުއް ގަތުމުގައި ގަވާއިދާ ޚިލާފުވުން ހިމެނެއެވެ. މީގެ އިތުރުން މި އަހަރުގެ އަޟްޙާ ޢީދު ކުޅިވަރާއި ސްޓޭޖުގެ ކަންކަމަށް ގަވާއިދާ ޚިލާފަށް ޚަރަދުކުރުމާއި ޢީދަށް ރަށު ތެރެ ޒީނަތްތެރިކުރުމަށް ލައިޓް ގަންނަން ސްޕްލިޓްކޮށްގެން ގިނަ ފައިސާ ދޫކޮށް އެ ތަކެތި ކައުންސިލަށް ނުލިބި އޮތް މައްސަލައާއި ޕްރޮކިއުމެންޓުގައި މަސައްކަތްކުރާ މުވައްޒަފުން ބިޑް ކޮމިޓީގައި ތިބި ކަމަށް ބުނެ ހުށަހެޅި މައްސަލައާއި މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ހޯދަން އެދޭ މަޢުލޫމާތު ކައުންސިލުން ނުދިނުމާއި ހޯކްސްއަށް 5000 އަކަފޫޓުގެ ބިމެއް ދޫކުރި ކަމަށް ބުނާ މައްސަލަ ވެސް ބެލި މައްސަލަތަކުގެ ތެރޭގައި ހިމެނެއެވެ.

ވަހީދާ ޚިލާފަށް ސީދާ ސަސްޕެންޝަނުގެ ފިޔަވަޅު އެޅި ނަމަވެސް ދެން ތިއްބެވި ކައުންސިލަރުންނާ މެދު ނިންމީ ނަޞޭޙަތް ދިނުމަށެވެ. އެ ބޭފުޅުންނަކީ ނައިބު ރައީސް އަޙްމަދު އިމްދާހާއި މެންބަރުން ކަމުގައިވާ އިބްރާހީމް ޝާކިރާއި މަރިޔަމް ވަކީލާއާއި އާމިނަތު ވިސާމާއާއި އާމިނަތު ނާސިޙާ އަދި އަޙްމަދު ރައޫފެވެ. ވަހީދު ހިމެނޭ ގޮތަށް މި ހުރިހާ ކައުންސިލަރުން ވެސް ނިސްބަތްވަނީ އިދިކޮޅު އެމްޑީޕީއަށެވެ.

އެލްޖީއޭގެ އިންކުއަރީން ހާމަވި ގޮތުގައި ލާމަރުކަޒީ ޤާނޫނުގައި ބަޔާންކޮށްފައިވާ މަސްއޫލިއްޔަތު އެކަށީގެންވާ ގޮތެއްގައި ކައުންސިލުން އަދައެއް ނުކުރެއެވެ. އަދި ކައުންސިލަރުންގެ ސުލޫކީ މިންގަނޑާ ޚިލާފު ޢަމަލުތައް ގެންގުޅޭ ކަމަށާއި އެލްޖީއޭގެ އެންގުންތަކަށް ޢަމަލު ނުކުރުމަށް ކައުންސިލް ޖަލްސާއަކުން ނިންމާފައިވާކަން ފާހަގަކުރެވިފައިވެއެވެ. މި ކަންކަމުގެ ސަބަބުން ހޯރަފުށީ ކައުންސިލަށާއި ލާމަރުކަޒީ ނިޒާމަށް ނުހަނު ގެއްލުން ލިބޭނެ ކަމަށް އެލްޖީއޭއިން ބުނެފައިވެއެވެ.

މި މައްސަލަތައް ބެލުމުގެ ތެރޭގައި ކައުންސިލަރުންނަށް ލިޔުމުން ޖަވާބުދާރީވާން ހަތް ދުވަހުގެ މުހުލަތެއް ދީ ކައުންސިލް އިދާރާއިން ކަމާ ގުޅޭ ލިޔެކިޔުންތައް ވެސް ހޯދާފައިވާ ކަމަށް އެލްޖީއޭއިން ހާމަކޮށްފައިވެއެވެ. މީގެ އިތުރުން އެ އަށް މައްސަލައިގައި ކައުންސިލް އިދާރާގެ ސެކްރެޓަރީ ޖެނެރަލާއި އިދާރީ އެހެން މުވައްޒަފެއްގެ އިހުމާލެއް ވާ ނަމަ ޒިންމާވާ މުވައްޒަފަށް ފިޔަވަޅު އެޅުމަށްޓަކައި ކަމާ ގުޅުން ހުރި ދައުލަތުގެ އިދާރާތަކަށް ހުށަހެޅުމަށް ވެސް އެލްޖީއޭއިން މިއަދު ނިންމާފައިވެއެވެ.