މީޑިއާ ދާއިރާ ހަރުދަނާކުރުމަށް ފަންނާއި ތަރިކައާ ބެހޭ ވުޒާރާއިން މަސައްކަތު ބައްދަލުވުމެއް ފަށައިފި

ނޫސްވެރިކަމަކީ ތެދުވެރި ޒިންމާދާރު ޚިދުމަތަކަށް ވާންޖެހޭ ކަމަށް ވިދާޅުވެ ނިޝާން ޢިއްޒުއްދީނުގެ ޢިއްޒަތުގެ ވެރިޔާ އައްބާސް އިބްރާހީމް ވާހަކަފުޅު ދައްކަވައިފިއެވެ.

އައްބާސް މިމޭރުމުން ވާހަކަފުޅު ދެއްކެވީ ފަންނާއި ސަގާފަތާއި ތަރިކައާ ބެހޭ ވުޒާރާއިން ޤައުމީ ކުތުބުޚާނާގައި ބޭއްވި މީޑިއާ މަސައްކަތު ބައްދަލުވުން ފެށުމުގެ ރަސްމިއްޔާތުގައެވެ. އެ ރަސްމިއްޔާތު ޝަރަފުވެރިކޮށްދެއްވީ އެ ވުޒާރާގެ ވަޒީރު ހީނާ ވަލީދެވެ. ޑިޖިޓަލް މަންސަތަކުގައި މީޑިއާ ހަލުވިކަމާ އެކު ކުރިއަރަމުންދާތީ މި ދާއިރާއަށް ފަރުވާކުޑަ ނުކުރެވޭނެ ކަމަށް އައްބާސް ފާހަގަކުރެއްވި ކަމަށެވެ.

"މީޑިއާގައި މަސައްކަތްކުރާ މީހުންގެ ޒިންމާތަކެއް އެބަ އޮވޭ. ތެދުވެރިވުން ވަފާތެރިވުން ހަގީގަތް ހާމަކުރުން އަމިއްލަ ހިޔާލާއި އަމިއްލަ އެދުންތައް ޚަބަރުގެ ތެރެއަށް ނުވެއްދުން އެހެންމީހުންގެ އިއްޒަތާއި އަބުރަށް ރައްކާތެރިވުން މިއީ އަޅުގަނޑުމެން މިޑިއާގެ މަސައްކަތް ކުރާއިރު ވިސްނަންޖެހޭ ކަންކަން. ހަމައެއާއިއެކީގައި އަޅުގަނޑުމެން ލިޔާ ކޮންމެ އެއްޗަކީވެސް އަޅުގަނޑުމެން އެއަށް ޖަވަބުދާރީ ވާންޖެހޭނެ އެއްޗެއް. އެއީ ހަމައެކަނި މިދުނިޔެއަކު ނޫން. އާޚިރަތުގައިވެސް ޖަވާބުދާރި ވާންޖެހޭނެ" ނިޝާން ޢިއްޒުއްދީނުގެ ޢިއްޒަތުގެ ވެރިޔާ އައްބާސް އިބްރާހީމް ވިދާޅުވިއެވެ.

ވުޒާރާގެ ދަށުގައިވާ ހުރިހާ މުއައްސަސާތަކަށް ހުޅުވައިލައިގެން ދެ ދުވަހުގެ މުއްދަތަށް ކުރިއަށް ގެންދާ މި ބައްދަލުވުމުގައި ޚަބަރާއި ރިޕޯޓު ލިޔުމުގެ ހުނަރުތަކާއި ފޮޓޯ ނެގުމާއި ވީޑިއޯ ކުރުމާއި ޕޯސްޓަރު ފަރުމާ ކުރުން ފަދަ ކަންކަން ދަސްކޮށްދިނުމަށް ވަނީ ރާވައިފައެވެ. މި ބައްދަލުވުމުގައި ބައިވެރިވާ މުއައްސަސާތަކުގެ ތެރޭގައި ނެޝަނަލް ސެންޓަރ ފޮރ ކަލްޗަރަލް ހެރިޓޭޖް (އެންސީސީއެޗް) އާއި ޤައުމީ ކުތުބުޚާނާ އާއި ދިވެހިބަހުގެ އެކެޑަމީ އާއި ޤައުމީ އަރުޝީފު އަދި އޮލިމްޕަސް ހިމެނެއެވެ.

މިއީ އެ ވުޒާރާއިން މީޑިއާ ދާއިރާ ހަރުދަނާކުރުމުގެ ގޮތުން ވަޒީރު ހީނާ ވަލީދު އިސް ނަންގަވައިގެން މުޅިން އަލަށް ފެށި ހަރަކާތެކެވެ.