ކަނޑުއޮތްގިރީގެ އައިސް ޕްލާންޓުން މަސްވެރިންނަށް ޚިދުމަތް ދޭން ފަށައިފި

ކަނޑުއޮތްގިރީގައި އަލަށް ބެހެއްޓި 25 ޓަނުގެ އައިސް ޕްލާންޓުން މިއަދު ރަސްމީކޮށް އައިސް ވިއްކަން ފަށައިފިއެވެ.

މި ޕްލާންޓް ގާއިމުކުރެވިފައިވަނީ އެ ސަރަހައްދުގައި މަސްވެރިކަން ކުރާ އުޅަނދުފަހަރަށް ވަކިން ޚާއްޞަކޮށް ކަންނެލީގެ މަސްވެރިކަމުގައި ހަރަކާތްތެރިވާ ފަރާތްތަކަށް އައިސް ލިބުމުގެ ދަތިކަމަށް ހައްލެއް ހޯދައިދިނުމުގެ ބޭނުމުގައެވެ.

ސަރުކާރުން ދަނީ މަސްވެރިކަން ރާއްޖޭގައި ކުރިއެރުވުމަށްޓަކައި ގިނަ މަސައްކަތްތަކެއް ކުރަމުންނެވެ. އެގޮތުން، މަސްވެރިންނަށް ދޭން ހުރި ހުރިހާ ފައިސާ އެއްވެސް ސަރުކާރުން ވަނީ މިއަހަރު ތެރޭގައި ދައްކާ ނިންމާފައެވެ.

މި ޚިދުމަތާއެކު އެ ސަރަހައްދުގެ މަސްވެރިންނަށް އައިސް ހޯދުމުގައި ކުރިން ކުރިމަތިވަމުން ދިޔަ ދަތިތަކަށް ބޮޑު ލުޔެއް ލިބިގެންދާނެއެވެ.