ރާއްޖޭގެ އެންމެ ބޮޑު މިސްކިތުގެ ބިންގާ އަންނަ މަހު 13 ގައި އެޅުމަށް ތައްޔާރުވަނީ

ރާއްޖެ އިސްލާމްވީތާ 900 އަހަރު ފުރޭ މުނާސަބަތާ ދިމާކޮށް ރާއްޖޭގައި މިހާތަނަށް ބިނާކުރާ އެންމެ ބޮޑު މިސްކިތުގެ ޢަމަލީ މަސައްކަތް ފެށުމަށް ތައްޔާރުވަމުންދާ ކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެ ތާރީޚީ މުނާސަބަތު ފާހަގަކުރެވެނީ އަންނަ މަހުގެ 13 ވަނަ ދުވަހުއެވެ. ވަޒީރު ޑރ. ޝަހީމް ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ ހުޅުމާލޭގައި ބިނާކުރާ މި މިސްކިތް ވެގެންދާނީ ރާއްޖޭގެ އިސްލާމީ ޙަޟާރަތުގެ މުއްސަނދި ތާރީޚާއި ފަރުމާވެރިކަން އެންމެ ފުރިހަމައަށް ރަމްޒުކޮށްދޭ ބިނާއަކަށް ކަމަށެވެ. އޭގެ އިތުރުން އީމާންކަމާއި ޢިލްމާއި ވަޙުދަތު ފެތުރުމުގެ މުހިންމު މަރުކަޒެއްގެ ގޮތުގައި އެ މިސްކިތް ޚިދުމަތް ދޭނެ ކަމަށް ވެސް ވަޒީރު ވިދާޅުވެފައިވެއެވެ.

މިސްކިތް އިމާރާތް ކުރުމަށް ހަމަޖެހިފައި ވަނީ ހުޅުމާލެ ދެ ވަނަ ފިޔަވައްސާއި ތިން ވަނަ ފިޔަވަހީގެ ދެމެދުގައެވެ. ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އެ ބިން މިހާރު ވަނީ އިސްލާމީ ކަންތައްތަކާ ބެހޭ ވުޒާރާއާ ރަސްމީކޮށް ހަވާލުކޮށްފައެވެ. އެ ވުޒާރާއިން ކުރިން ހާމަކޮށްފައިވާ ގޮތުގައި ގާތްގަނޑަކަށް 10,000 މީހުންނަށް އެއް ފަހަރާ ނަމާދުކުރެވޭ ޖާގަ މި މިސްކިތުގައި ހިމެނޭނެއެވެ. ނަމާދުކުރާ ޖާގައިގެ އިތުރުން ޤުރުއާން މިއުޒިޔަމެއް ވެސް މި މިސްކިތް ކޮމްޕްލެކްސްގައި ހިމެނެއެވެ.

ވަޒީރު ޑރ. ޝަހީމް ވިދާޅުވީ ބިންގާ އެޅުމުގެ ކުރިން ނިންމަންޖެހޭ ހުރިހާ ކަމެއް ސަރުކާރުން ކުރަމުންދާ ކަމަށެވެ. އަދި މި މިސްކިތް ވެގެންދާނީ ރާއްޖޭގެ 900 އަހަރުވީ އިސްލާމީ ތާރީޚާއި ޢިލްމާއި ޚިދުމަތް ކުރިއަށް އޮތް ޖީލުތަކަށް ވާޞިލުކޮށްދޭ ތަރިކައަކަށް ކަމަށް ވެސް ވިދާޅުވެފައިވެއެވެ.

މި މަޝްރޫޢަށް ފައިނޭންސް ކުރުމާ ގުޅޭ ފަހުމުނާމާއެއްގައި ސައޫދީ ޢަރަބިއްޔާގެ އަލްރަޖްހީ ކުންފުންޏާ އެކު އެ ވުޒާރާއިން ވަނީ ސޮއިކޮށްފައެވެ. ރާއްޖޭގެ އެންމެ ބޮޑު މިސްކިތް ބިނާކުރުމުގެ މަޝްރޫޢު އިޢުލާނުކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ ބަޔާނުގައެވެ.