ޑޮލަރު މާރުނުކުރާ ދެ ރިސޯޓެއްގެ ނަން އެމްއެމްއޭއިން ހާމަކޮށްފި

ބޭރު ފައިސާއާ ބެހޭ ޤާނޫނުގައި ލާޒިމުކޮށްފައިވާ ގޮތަށް އެއްވެސް މިންވަރަކަށް ޑޮލަރު މާރުނުކުރާ ދެ ރިސޯޓެއްގެ ނަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު އާންމުކޮށްފިއެވެ.

އެ ދެ ރިސޯޓަކީ ރަހާ ރިސޯޓާއި ސައުތު ޕާމް ރިސޯޓް މޯލްޑިވްސް ކަމަށް މަރުކަޒީ ބޭންކުން ބުނެފައިވެއެވެ. ގިނަ ރިސޯޓުތަކުން ޤާނޫނާ އެއްގޮތަށް ބޭރު ފައިސާ މާރުކުރަމުންދާކަން ފާހަގަކޮށް ފައިސާ މާރުކުރުމުގެ އިލްތިޒާމުތައް ފުރިހަމަކުރުމަށް ހުރިހާ ފަރާތްތަކަށް އެމްއެމްއޭއިން ވަނީ އިލްތިމާސްކޮށްފައެވެ.

އެމްއެމްއޭއިން ނެރުނު ކޮމްޕްލަޔަންސް ރިޕޯޓަށް ބަލާއިރު ރިސޯޓުތަކުގެ ތެރެއިން %78 ތަނުން ޑޮލަރު މާރުކުރުމުގެ ކަންކަން ރަނގަޅަށް ކުރިއަށް ގެންގޮސްފައިވެއެވެ. ނަމަވެސް %20 ރިސޯޓުން އެ ކަންކަން އެންމެ އެކަށީގެންވާ ގޮތުގައި ކުރިއަށް ގެންގޮސްފައެއް ނުވެއެވެ. އެ %20 ގެ ތެރެއިން ގިނަ ފަރާތްތަކުން ތަފާތު ސަބަބުތައް ދައްކައި ކޮންސެޝަނެއް ހޯދުމަށް އެދިފައިވީ ނަމަވެސް ޤާނޫނީ އިލްތިޒާމުތައް ފުއްދުން ލާޒިމުވާނެ ކަމަށް އެމްއެމްއޭއިން ވަނީ ހަނދާންކޮށްދީފައެވެ.

ގެސްޓްހައުސް ޓޫރިސްޓް ހޮޓާ ސަފާރީ އަދި ހޯމްސްޓޭ ފަދަ ތަންތަން ހިމެނޭ ކެޓަގަރީ ބީ އަށް ބަލާއިރު %48 ތަނުން ފައިސާ މާރުކުރުން ރަނގަޅަށް ކުރިއަށް ގެންގޮސްފައިވާ އިރު %37 ތަނުން އެއްވެސް ވަރަކަށް ޑޮލަރު މާރުކޮށްފައެއް ނުވެއެވެ. މެދު ފަންތީގެ ވިޔަފާރިތަކަށް ވާތީ ޤާނޫނީ އޮނިގަނޑުގެ ތެރެއިން އިތުރު ފުރުޞަތު ދީ ހޭލުންތެރިކުރުމުގެ މަސައްކަތް ކުރަމުންދާ ކަމަށް އެމްއެމްއޭއިން ބުނެފައިވެއެވެ. އަހަރަކު 15 މިލިއަން ޑޮލަރަށްވުރެ ބޮޑު އާމްދަނީ ލިބޭ ވިޔަފާރިތައް ހިމެނޭ ކެޓަގަރީ ސީ ގައި %38 ތަނުން ރަނގަޅަށް ޑޮލަރު މާރުކުރި އިރު %29 ތަނުން އެއްގޮތަކަށް ވެސް މާރުކޮށްފައެއް ނުވެއެވެ. މި ކެޓަގަރީގެ ވިޔަފާރިތަކާ މެދު ގޮތެއް ނިންމެން އޮތީ ޤާނޫނަށް އިޞްލާޙު ގެނެސްގެން ކަމަށް ވާތީ އެ އިޞްލާޙު ހުށަހަޅާފައިވާ ކަމަށް ވެސް އެ އިދާރާއިން ބުނެފައިވެއެވެ.

ބޭރު ފައިސާއާ ބެހޭ ޤާނޫނުގެ ދަށުން ރިސޯޓުތަކުން މާރުކުރާ ޑޮލަރުގެ %90 ލިބެނީ އެމްއެމްއޭ އަށެވެ. އޭގެ ތެރެއިން %30 ބޭންކުތަކަށް ދޫކުރާ އިރު ދިވެހި ބޭންކުތަކަށް އިސްކަން ދެއެވެ. ބޭންކުތަކަށް އެ ގޮތުން ލިބޭ ޑޮލަރު ބޭނުންކުރަން ޖެހެނީ ޢާންމުންގެ ޒަރޫރީ ބޭނުންތަކާއި ކާބޯތަކެތި އެތެރެކުރުން ފަދަ ކަންކަމަށެވެ. އެ ޢަދަދުގެ ބޮޑު ބައެއް ކުދި އަދި މެދު ފަންތީގެ ވިޔަފާރިތަކަށް ބޭރު ފައިސާ ފޯރުކޮށްދިނުމަށް ޚާއްޞަކުރެވެއެވެ. ހަމައެހެންމެ އެމްއެމްއޭގައި ބެހެއްޓޭ ޑޮލަރުގެ ބޮޑު ބައެއް ހޭދަކުރަނީ ތެލާއި ގޭހާއި ބޭހާއި އަސާސީ މުދާ އެތެރެކުރުމަށް ކަމަށް ވާތީ ރިސޯޓުތަކުން ޑޮލަރު މާރުކުރުމުގެ ސީދާ ފައިދާ ވިޔަފާރިތަކާއި ރައްޔިތުންނަށް ކުރެއެވެ.