ޓީޖީއެސްޓީ ޤާނޫނަށް ގެނައި އިސްލާހު އަލުން މުރާޖަޢާކުރުމަށް ރައީސް ނިންމަވައިފި

ބޭރުގެ ޓުއާ އޮޕަރޭޓަރުންނާއި ބުކިން ޕްލެޓްފޯމްތަކުން ޓީޖީއެސްޓީ ނެގުމާ ގުޅޭ ގޮތުން ޓެކްސް ނެގުމާ ބެހޭ އިދާރީ ޤާނޫނަށް ގެނައި ބަދަލު އިސްލާހުކުރެއްވުމަށް ރައީސުލްޖުމްހޫރިއްޔާ ނިންމަވާފައިވާ ކަމަށް ޓޫރިޒަމް ވަޒީރު މުޙައްމަދު އަމީން ރޭ ވިދާޅުވެއްޖެއެވެ.

ޓޫރިޒަމް ދުވަހުގެ ރަސްމީ ޚާއްޞަ ޖަލްސާގައި ވާހަކަފުޅު ދައްކަވަމުން ވަޒީރު ވިދާޅުވީ، މިދިޔަ މަހު ތަސްދީޤުކުރެވުނު އެ ޤާނޫނާ މެދު ފަތުރުވެރިކަމުގެ ދާއިރާއާއި ބައިނަލްއަޤުވާމީ ޓުއާ އޮޕަރޭޓަރުންގެ ފަރާތުން ބޮޑެތި ކަންބޮޑުވުންތަކެއް ހުށަހެޅިފައިވާ ކަމަށެވެ. އެ ކަންބޮޑުވުންތަކާ ގުޅިގެން ޔޫރަޕުގެ ބައެއް ޓުއާ އޮޕަރޭޓަރުން ރާއްޖެއަށް ބުކިން ހެދުން މެދުކަނޑައިލާފައިވާ ކަމަށް ވެސް އަމީން ފާހަގަކުރެއްވިއެވެ.

އެ ޤާނޫނަށް ޢަމަލުކުރަން ފެށީ މި މަހުގެ އެއް ވަނަ ދުވަހުން ފެށިގެންނެވެ. ވަޒީރު ވިދާޅުވި ގޮތުގައި ރައީސް މިހާރު ނިންމަވާފައިވަނީ ޑެސްޓިނޭޝަން ޕްރިންސިޕަލްގެ އުސޫލުން އެ ޤާނޫނަށް ވީ އެންމެ އަވަހަކަށް ބަދަލުތަކެއް ގެނައުމަށެވެ.

ތަސްދީޤުކުރެވުނު ޤާނޫނުގެ ދަށުން އޯފްޝޯ ބުކިން ޕްލެޓްފޯމްތަކާއި ބޭރުގެ ޓުއާ އޮޕަރޭޓަރުންގެ ޚިދުމަތްތަކުން ޖީއެސްޓީ ނެގުމުގެ އުސޫލުތައް ޓެކްސް ނިޒާމަށް އިތުރުކުރީ އެ ނިޒާމުގައި ހުރި ދަތިތައް ޙައްލުކޮށް ހަރުދަނާ ކުރުމުގެ ބޭނުމުގައެވެ. މި ބަދަލުތައް ތަންފީޒުކޮށް ޓެކްސް ނެގޭ ނަމަ، ބޭރުގެ ޓްރެވެލް އެޖެންޓުން ދައްކާ 299.3 މިލިއަން ރުފިޔާ އާއި ފޮރިން ޓުއާ އޮޕަރޭޓަރުން ދައްކާ 1.3 ބިލިއަން ރުފިޔާއާ އެކު ދައުލަތަށް އަހަރަކު 1.6 ބިލިއަން ރުފިޔާ އިތުރުވާނެ ކަމަށް ލަފާކޮށްފައިވެއެވެ.

މީގެ އިތުރުން އަމީން ވިދާޅުވީ ފަތުރުވެރިކަމުގެ ދާއިރާއަށް 54 އަހަރު ފުރިގެންދިޔައިރު ރާއްޖެ ވެފައިވަނީ ދުނިޔޭގެ އެންމެ މަޤުބޫލު އެއް މަންޒިލަށް ކަމަށާއި، 2040 ވަނަ އަހަރު ރާއްޖެ އެންމެ ތަރައްޤީވެފައިވާ ޤައުމަކަށް ހެދުމުގެ އަމާޒަށް ވާސިލުވުމަށް އެ ދާއިރާ ޑައިވާސިފައި ކުރުމުގެ ފިޔަވަޅުތައް އަޅުއްވަމުން ގެންދަވާ ކަމަށެވެ. މެދުއިރުމަތީ ހަނގުރާމައިގެ ސަބަބުން ފަތުރުވެރިކަމަށް ބޮޑު އަސަރެއް ކުރި ނަމަވެސް، އެ ގޮންޖެހުންތަކުން އަރައިގަނެ ޒިޔާރަތްކުރާ ފަތުރުވެރިންގެ ޢަދަދު އިތުރުވަމުން އަންނަ ކަމަށް ވެސް ވަޒީރު ވިދާޅުވިއެވެ.

މި އަހަރުގެ ސެޕްޓެމްބަރު މަހާ ހަމައަށް ރާއްޖެއަށް 1.5 މިލިއަން ފަތުރުވެރިން ޒިޔާރަތްކޮށްފައިވާއިރު، އެއީ ކުރީ އަހަރުގެ އެ މުއްދަތާ އަޅައިބަލާއިރު 3.4 އިންސައްތައިގެ ދަށްވުމެކެވެ.