ދާރުއްސަލާމް ވަޤްފު ޢިމާރާތް ހުޅުމާލޭގައި ބިނާކުރުމުގެ މަސައްކަތް ފަށައިފި

ރާއްޖޭގައި މިހާތަނަށް އިމާރާތްކުރާ އެންމެ ބޮޑު ވަޤްފު ޢިމާރާތް ކަމުގައިވާ ދާރުއްސަލާމްގެ ޢަމަލީ މަސައްކަތް ހުޅުމާލޭގައި ފަށައިފިއެވެ.

244 މިލިޔަން ރުފިޔާ ޚަރަދުކޮށްގެން ކުރިއަށް ގެންދާ މި މަޝްރޫޢު ޙަވާލުކޮށްފައި ވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާއެވެ. ހުޅުމާލެ ޕްލޮޓް ނަންބަރު 11646 ގައި އަމީން އެވެނިއު ކުރިމައްޗަށް ވާ ގޮތަށް އިމާރާތްކުރާ މި ތަނުގައި ޒަމާނީ ވަސީލަތްތަކާ އެކު 13 ފަންގިފިލާ ހިމެނޭނެއެވެ. ބޭންކް އޮފް މޯލްޑިވްސް އިސްލާމިކް ފައިނޭންސް މެދުވެރިކޮށް ފައިނޭންސް ކުރާ މި މަޝްރޫޢު 24 މަސް ދުވަހުގެ ތެރޭގައި ނިންމުމަށް ވަނީ ރޭވިފައެވެ.

މި ޢިމާރާތުގައި ޕާކިން ސަރަޙައްދަކާއި ގްރައުންޑް ފްލޯގައި ރިސެޕްޝަނާއި އިތުރު ޕާކިން ވަސީލަތްތައް ޤާއިމުކުރާނެއެވެ. ހަމައެހެންމެ ކޮންފަރެންސް ހޯލަކާއި ޒަމާނީ އޮފީސް ބައިތަކާއި ބައްދަލުވުންތަކަށް ޚާއްޞަ ކޮޓަރިތަކާއި ނަމާދުކުރާ ކޮޓަރިއެއް ވެސް ހިމެނޭނެއެވެ. އޭގެ އިތުރުން ޑޭ ކެއަރ ސެންޓަރެއް ތަރައްޤީކުރާ އިރު ލިފްޓު ހަރުކޮށް ޚާއްޞަ އެހީއަށް ބޭނުންވާ ފަރާތްތަކަށް ފަސޭހައިން ވަދެ ނުކުމެ އުޅެވޭ ގޮތް ހަމަޖައްސާނެއެވެ. ޢިމާރާތުގެ ރޫފް ޓޮޕް ފަރުމާކޮށްފައި ވަނީ ހުޅުވާލެވިފައިވާ ޓެރެސެއްގެ ގޮތުގައެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވާ ގޮތުގައި މި ޢިމާރާތުން އަހަރަކު 60 މިލިޔަން ރުފިޔާގެ އާމްދަނީ ލިބޭނެ ކަމަށް ލަފާކުރެވެއެވެ. އެ އާމްދަނީގެ %20 ދިވެހިރާއްޖޭގެ ޒަކާތު ހައުސްއަށް ޖަމާކުރާ އިރު ބާކީ %80 އިސްލާމިކް ވަޤްފު ފަންޑަށް ޖަމާކުރާ ގޮތަށް ވަނީ ހަމަޖެހިފައެވެ. މަޝްރޫޢު ނިމުމަށް ފަހު ފަސް އަހަރު ވަންދެން ޢިމާރާތުގެ މެއިންޓެނެންސް ބެލެހެއްޓުން ވެސް އާރުސީސީން ކުރިއަށް ގެންދާ ގޮތަށް ވަނީ އެއްބަސްވެފައެވެ.

ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދާ އެއްގޮތަށް ވަޤްފު ފަންޑު ފުޅާކޮށް އިސްލާމީ ދާއިރާއަށް މާލީ މަންފާ ހޯދައިދިނުމުގެ މި މަޝްރޫޢުގެ ބިންގާ 26 ނޮވެމްބަރު 2025 ގައި އެޅުއްވައިދެއްވީ ރައީސް ޑރ. މުޢިއްޒެވެ.