ރައީސް މުޢިއްޒު ފައިމަގުގައި މާލެއިން ވިލިމާލެއަށް ވަޑައިގެންފި

ތިލަމާލެ ބުރިޖުގެ މަސައްކަތް ބައްލަވައިލެއްވުމަށް ކުރެއްވި ޒިޔާރަތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައިމަގުގައި މާލެއިން ވިލިމާލެއަށް ވަޑައިގެންފިއެވެ.

މި ޒިޔާރަތުގައި ސަރުކާރުގެ ވަޒީރުންނާއި ބައެއް އިސް ބޭފުޅުން ރައީސްގެ އަރިހުގައި ބައިވެރިވެ ވަޑައިގެންނެވިއެވެ. މާލެ ސަރަޙައްދުގެ އެންމެ ބިޔަ ޢުމްރާނީ ތަރައްޤީގެ މަޝްރޫޢުގެ ތެރެއިން މާލެއާއި ވިލިމާލެ ގުޅުވައިދޭ ފަހު ސެގްމަންޓު ޖެހީ ނިމިދިޔަ ހަފުތާ ތެރޭގައެވެ.

އިންޑިއާގެ އެފްކޮންސް ކުންފުންޏާ ހަވާލުކޮށްގެން 2022 ވަނަ އަހަރު ފެށި މި ބުރިޖުގެ މަސައްކަތް އަވަސްކުރުމަށް އިންޑިއާ ސަރުކާރާއި ކޮންޓްރެކްޓަރުންނާ އެކު މަޝްވަރާކުރުމަކީ ރައީސް މުޢިއްޒު ވެރިކަމާ ހަވާލުވެ ވަޑައިގެން އެންމެ ފުރަތަމަ ފެއްޓެވި މަސައްކަތްތަކުގެ ތެރޭގައި ހިމެނޭ ކަމެކެވެ. ކުރީ ސަރުކާރު ނިމުނުއިރު ނިމިފައި އޮތީ މުޅި މަޝްރޫޢުގެ ގާތްގަނޑަކަށް 30 އިންސައްތައެވެ. ނަމަވެސް މިހާރު މަޝްރޫޢުގެ 76 އިންސައްތަ ވަނީ ފުރިހަމަވެފައެވެ.

ބުރިޖާއި ކޯޒުވޭ ހިމެނޭ ގޮތުން 6.7 ކިލޯމީޓަރު ދިގު މި ކަނެކްޝަނުން މާލެ ވިލިމާލެ ގުޅިފަޅު އަދި ތިލަފުށި ގުޅާލެވޭނެއެވެ. އެ ރަށްތައް ހުރަސްކުރާ ހައިވޭތައް ހެދުމުގެ މަސައްކަތް ބުރިޖުގެ މަސައްކަތާ އެކީގައި ކުރިއަށް ގެންދާނެއެވެ. ބުރިޖުގެ ފެންވަރު ކަށަވަރުކުރުމަށް ޚާއްޞަ ސަމާލުކަމެއް ދެއްވާ ކަމަށް ސަރުކާރުން ވިދާޅުވެފައިވެއެވެ.

ޖުމްލަ 500 މިލިއަން ޑޮލަރު — ހަތް ބިލިއަން ރުފިޔާއަށް ވުރެ ބޮޑު — ޚަރަދެއް ހިނގާ މި މަޝްރޫޢަށް ފައިސާ ހަމަޖައްސާފައި ވަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ހިލޭ އެހީއާއި 400 މިލިއަން ޑޮލަރުގެ ލައިން އޮފް ކްރެޑިޓާއި ދިވެހި ސަރުކާރުގެ ބައިވެރިވުމުންނެވެ. ސަރުކާރުގެ އަމާޒަކީ އަންނަ އަހަރުގެ ނިޔަލަށް މި މަޝްރޫޢުގެ ހުރިހާ މަސައްކަތެއް ނިންމައި ޚިދުމަތް ފެށުމެވެ.