ބިދޭސީ މުވައްޒަފުންނަށް މުސާރަ ދިނުމުގައި ބޭންކް އެކައުންޓް ބޭނުންކުރުން ލާޒިމުކޮށްފި

ރާއްޖޭގައި މަސައްކަތް ކުރާ ބިދޭސީންނަށް މުސާރަ ދޭއިރު އެ ފައިސާ ބޭންކް އެކައުންޓް މެދުވެރިކޮށް ޖަމާކުރަން ޖެހޭ ގޮތަށް ގަވައިދު އިސްލާހުކޮށް މިއަދު ޢަމަލުކުރަން ފަށައިފިއެވެ.

ހޯމްލޭންޑް ސެކިއުރިޓީ ވުޒާރާއިން "ރާއްޖޭގައި ބިދޭސީން ވަޒީފާ އަދާކުރުމުގެ ގަވައިދު" އަށް ތިން ބަދަލެއް ގެނެސްފައިވެއެވެ. އެ ބަދަލުތަކުގެ ތެރޭގައި ބިދޭސީ މުވައްޒަފެއްގެ މުސާރަ ދޭންވާނީ ރާއްޖޭގެ ބޭންކެއްގައި އެ މީހެއްގެ ނަމުގައި ހުޅުވާފައިވާ އެކައުންޓަކަށް ކަމަށް ކަނޑައެޅުން ހިމެނެއެވެ. މި ބަދަލަށް ޢަމަލުކުރަން ފެށުމަށް ހަމަޖެހިފައި ވަނީ ގަވައިދު ގެޒެޓުގައި ޝާއިޢުކުރާ ތާރީޚުން ފެށިގެން އެއް މަސް ދުވަސް ފަހުންނެވެ.

މި ބަދަލު ގެނެސްފައި ވަނީ ގިނަ ޢަދަދެއްގެ ބިދޭސީން ގަވައިދުގެ ތެރެއަށް ފެއްތުމުގެ މަސައްކަތަށް ފަހުގައެވެ. ކުރިން މި ފިޔަވަޅު ތަންފީޒުކުރުމުގައި ދަތިތައް ކުރިމަތިވީ ސައްޙަ ލިޔެކިޔުމެއް ނެތް ބިދޭސީން ގިނަވެ އެ ފަރާތްތަކަށް ބޭންކް އެކައުންޓް ނުހުޅުވެން ދިމާވެގެންނެވެ.

ވަޒީފާއާ ބެހޭ ޤާނޫނަށް 2016 ވަނަ އަހަރު ގެނައި އިސްލާހުގެ ދަށުން ވެސް ބިދޭސީންނަށް ބޭންކް މެދުވެރިކޮށް މުސާރަ ދިނުން ލާޒިމުކޮށް ޚިލާފުވާ ފަރާތްތައް ޖޫރިމަނާ ކުރެވޭ ގޮތް ހެދި ނަމަވެސް ވަކި ހިސާބަކުން ޖޫރިމަނާ ނެގުން މެދުކެނޑުނެވެ.

ބޭންކް އެކައުންޓް މެދުވެރިކޮށް މުސާރަ ދިނުން ލާޒިމުކުރި އެންމެ ބޮޑު ބޭނުމަކީ ބިދޭސީން ރާއްޖެއިން ބޭރަށް ފޮނުވާ ފައިސާއިން ދައުލަތަށް ނަގާ ރެމިޓެންސް ޓެކްސް ހޯދުމެވެ. ރެމިޓެންސް ޓެކްސްގެ ގޮތުގައި ކޮންމެ ބިދޭސީއަކު ރާއްޖެއިން ބޭރަށް ފޮނުވާ ފައިސާގެ ތިން ޕަސެންޓް ދައުލަތަށް ނެގެއެވެ.