ދަސްވެނީން އީޖާދީ ޙައްލުތައް ހޯއްދަވައިދެއްވުމަށް ނައިބު ރައީސް އެދިވަޑައިގެންފި

ވިލާ ކޮލެޖުގެ ސްޓޫޑެންޓް އެޗީވްމަންޓް އެވޯޑްސް 2026 ޙަފުލާ ޝަރަފުވެރިކޮށްދެއްވައި ވާހަކަފުޅު ދައްކަވަމުން، ޤައުމަށް ބޭނުންތެރި ދާއިރާތަކުގައި އީޖާދީ ޙައްލުތައް ހޯއްދަވައިދެއްވުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް މިރޭ ދަސްވެނީންގެ ކިބައިން އެދިވަޑައިގެންފިއެވެ.

ނައިބު ރައީސް ވިދާޅުވީ ޤައުމާއި މުޖުތަމަޢަށް ކުރިމަތިވެފައިވާ ގޮންޖެހުންތައް ޙައްލުކުރުމުގައި ދަސްވެނީންގެ ފިކުރުތަކުން އީޖާދީ ވިސްނުން އިސްކުރަންޖެހިފައިވާ ކަމަށެވެ. މުޖުތަމަޢަށް ދާއިމީ ޙައްލު ހޯދައިދިނުމުގައި އެ ބޭފުޅުންގެ ވިސްނުމުގެ ބޭނުން އިންތިހާއަށް ބޮޑުކަން ފާހަގަކުރައްވައި، މުޅި މުޖުތަމަޢު އުފާކުރުވަނިވި ކަންތައްތައް ކޮށްދެއްވާނެ ކަމުގެ ޔަޤީންކަން އޮތް ކަމުގައި ވިދާޅުވިއެވެ.

އެމަނިކުފާނު ވިދާޅުވި ގޮތުގައި ދަސްވެނީން މަސައްކަތު މާޙައުލަށް ނުކުމެ އެ މާޙައުލާ ގުޅޭ އީޖާދީ ވިސްނުންތައް ގެނެސްދެއްވާނެއެވެ. އޭގެ ނަތީޖާއެއްގެ ގޮތުން ރައްޔިތުންނާއި މުއައްސަސާތަކާ ދެމެދު އޮންނަ އިތުބާރު ބަދަހިވެ ފުރިހަމަވެގެންދާނެ ކަމަށް ވެސް ވިދާޅުވިއެވެ.

ނައިބު ރައީސް ވިދާޅުވީ ދިވެހިރާއްޖެ ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި ފެނުމަކީ ކޮންމެ ދިވެހި ރައްޔިތެއްގެ ވެސް ބޮޑު އުންމީދެއް ކަމަށެވެ. 2040 ވަނަ އަހަރުގެ ނިޔަލަށް ރާއްޖެ ތަރައްޤީވެފައިވާ ޤައުމަކަށް ހެއްދެވުމުގެ ދުރުރާސްތާ ތަޞައްވުރެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކަނޑައަޅުއްވައި އިޢުލާންކުރައްވާފައިވާ ކަމަށް ވިދާޅުވެ، އެ ތަޞައްވުރު ޙާޞިލުކުރުމަށް ޒުވާނުން އިސްނަގައިގެން އީޖާދީ ވިސްނުމާ އެކު ބައިވެރިވެވަޑައިގަންނަވާނެ ކަމަށް އުންމީދުކުރައްވާ ކަމުގައި ވެސް ވިދާޅުވިއެވެ.

މިރޭގެ ޙަފުލާގައި ޤާސިމް އިބްރާހީމް އެވޯޑް ފޮރ އެކްސެލެންސް ޙާޞިލުކުރި ޕޯސްޓް ގްރެޖްއޭޓް ޕްރޮގްރާމްގެ ދަސްވެނީންނަށް އެވޯޑް ހަވާލުކޮށްދެއްވީ ނައިބު ރައީސެވެ.