ބްރޯޑްކާސްޓިން ދުވަހާ ގުޅިގެން އެމްއެމްބީސީން ޒިންމާދާރު ނޫސްވެރިކަމަށް ބާރުއަޅައިފި

ބްރޯޑްކާސްޓިން ދުވަސް ފާހަގަކުރުމުގެ ގޮތުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން މިއަދު ނޫސް ބަޔާނެއް ނެރެ، ދޮގު މަޢުލޫމާތު ފެތުރުމާއި ފިތުނައަށް މަގުފަހިވާ ކަންކަމުން ބްރޯޑްކާސްޓަރުން ދުރުހެލިވުމަށް ގޮވާލައިފިއެވެ.

އެ ބަޔާނުގައި އެމްއެމްބީސީން ބުނީ ބްރޯޑްކާސްޓިންގެ ޚިދުމަތަކީ ޤައުމެއްގެ އިޖުތިމާޢީ، ސިޔާސީ އަދި އިޤުތިޞާދީ ހޭލުންތެރިކަން ކުރިއެރުވުމާއި ރައްޔިތުންނަށް ތެދު މަޢުލޫމާތު ފޯރުކޮށްދިނުމުގެ އެންމެ މުހިންމު އެއް ވަސީލަތް ކަމަށެވެ. އެ ކޮމިޝަނުން ވަނީ ޤައުމީ މަސްލަޙަތު އިސްކޮށް ޒިންމާދާރުކަމާ އެކު ޚަބަރާއި މަޢުލޫމާތު ފެތުރުމަށް ބްރޯޑްކާސްޓަރުންނަށް އިލްތިމާސްކޮށްފައެވެ.

އިސްލާމީ ރިވެތި އަޚުލާޤާއި ދިވެހި ޤައުމިއްޔަތާއި ސަޤާފަތް ދެމެހެއްޓުމާ އެކު ޞައްޙަ މަޢުލޫމާތު ރައްޔިތުންނާ ހަމައަށް ގެނެސްދިނުމަކީ 1962 ވަނަ އަހަރުގެ ޑިސެމްބަރު 29 ގައި "މާލެ ރޭޑިއޯ"ގެ ނަމުގައި ފެށުނީއްސުރެ ބްރޯޑްކާސްޓަރުން އަދާކުރަމުން އަންނަ އަގުހުރި ޤައުމީ ޚިދުމަތެއް ކަމަށް ވެސް އެ ކޮމިޝަނުން ފާހަގަކޮށްފައިވެއެވެ.

"މިއަދު އަޅުގަނޑުމެން ދިވެހިރާއްޖޭގެ ބްރޯޑްކާސްޓިން ދުވަސް ފާހަގަކުރާއިރު މިއަދާ ހިސާބަށް ދިވެހިރާއްޖޭގައި 37 ބްރޯޑްކާސްޓަރުން އަދި 29 ރީބްރޯޑްކާސްޓަރުން ހިދުމަތް ދެމުން ގެންދާކަން އުފަލާއިއެކު ފާހަގަކުރަމެވެ" އެ ބަޔާނުގައި ބުނެފައިވެއެވެ.

މީގެ އިތުރުން ޓެކްނޮލޮޖީއާއި މީޑިއާގެ ދާއިރާއަށް އަންނަ ބަދަލުތަކާ އެއްހަމައެއްގައި ޒަމާނީ ވަސީލަތްތައް ބޭނުންކޮށްގެން ފެންވަރު ރަނގަޅު ޚިދުމަތް ދިނުމަށާއި ދާއިރާގެ މަސައްކަތްތެރިންގެ ފަންނީ ޤާބިލުކަން އިތުރުކުރުމަށް މަސައްކަތް ކުރާނެ ކަމުގެ ޔަޤީންކަން އެމްއެމްބީސީން ދީފައިވެއެވެ. ޤާނޫނާއި ގަވާއިދުގެ އިމުގެ ތެރެއިން މިނިވަން އަދި ޒިންމާދާރު ނޫސްވެރިކަމެއް ޤާއިމުކުރުމަށް ބާރުއެޅުމަކީ އެ ކޮމިޝަނުގެ މައިގަނޑު އެއް އަމާޒު ކަމަށް ވެސް އެ ބަޔާނުގައި ބުނެފައިވެއެވެ.