މޯލްޑިވްސް އިންފްލައިޓް ކޭޓަރިންނަށް މިދިޔަ އަހަރު ލިބުނު އާމްދަނީ ބިލިއަން ރުފިޔާ އާ ގާތަށް

މޯލްޑިވްސް އިންފްލައިޓް ކެޓަރިންނަށް 2025 ވަނަ އަހަރު ލިބުނު އާމްދަނީ ބިލިއަން ރުފިޔާ އާ ގާތަށް ޖެހިލައިފިއެވެ.

އޮޑިޓް އޮފީހުން ނެރެފައިވާ އިންފްލައިޓްގެ އޮޑިޓްގެ މާލީ ބަޔާންތަކަށް ބަލާއިރު، މިދިޔަ އަހަރު އާމްދަނީގެ ގޮތުގައި އެތަނަށް ވަނީ 59.9 މިލިއަން ޑޮލަރު ލިބިފައެވެ. އެއީ ދިވެހި ފައިސާއިން ބަލާނަމަ، 923.6 މިލިއަން ރުފިޔާ އެވެ. މި މުއްދަތުގެ ތެރޭގައި ހިންގުމުގެ ހަރަދަށް 17 މިލިއަން ޑޮލަރު، 262 މިލިއަނަށް ވުރެ ގިނަ ރުފިޔާ ވަނީ ލިބިފައެވެ.

އިންފްލައިޓް ކޭޓަރިންގެ މިދިޔަ އަހަރު ލިބުނު އާމްދަނީއަށް ބަލާއިރު، ކޭޓަރިންގެ އޮޕަރޭޝަންތަކަށް 28.6 މިލިއަން ޑޮލަރު ކެބިން ހޭންޑްލިން އާމްދަނީއަށް 5.8 މިލިއަން ޑޮލަރު ވަނީ ލިބިފައެވެ. އަދި ހުޅުލޭ އައިލެންޑް ހޮތަލުގެ އޮޕަރޭޝަންތަކަށް ކޮޓަރިތަކުން 5.4 މިލިއަން ޑޮލަރު ލިބުނުއިރު، ފުޑް އެންޑް ބެވަރެޖުން ވަނީ 4.4 މިލިއަން ޑޮލަރު ލިބިފައެވެ. ރިސޯޓް އޮޕަރޭޝަންތަކަށް ބަލާއިރު، ރޫމް އަދި ފުޑްއެންޑް ބެވަރޭޖުން ވަނީ ޖުމްލަ 14.8 މިލިއަން ޑޮލަރުގެ އާމްދަނީއެއް ލިބިފައެވެ.

މިދިޔަ އަހަރު އިންފްލައިޓް ކޭޓަރިންގެ އިދާރީ ހަރަދުގެ ގޮތުގައި 394 މިލިއަނަށްވުރެ ގިނަ ރުފިޔާ ވަނީ ހޭދަވެފައެވެ. ޓެކްސްއަށް ކެނޑުމުގެ ކުރިން މިދިޔަ އަހަރު 260.5 މިލިއަން ރުފިޔާ ލިބުނުއިރު ޓެކްސްއަށް ކެނޑުމަށްފަހު އެކުންފުނީގެ މިދިޔަ އަހަރުގެ ސާފްފައިދާއަކީ، 222.04 މިލިއަން ރުފިޔާއެވެ.

މޯލްޑިވްސް އިންފްލައިޓް ކޭޓަރިންގެ ބެލެންޝީޓްގެ އުސްއަލިތަކަށް ބަލާއިރު، ވިޔަފާރިން އެކުންފުންޏަށް ލިބެންޖެގޭ ފައިސާގެ އަދަދު 10.5 މިލިއަން ޑޮލަރު ނުވަތަ ދިވެހި ރުފިޔާއިން ބަލާނަމަ 161 މިލިއަނަށް އަރައެވެ.