މިފްކޯއިން ކަޅުބިލަމަސް ކިލޯއެއް ގަންނަ އަގު 21 ރުފިޔާއަށް ބޮޑުކޮށްފި

ސަރުކާރުގެ މަސް ކުންފުނި މިފްކޯއިން ކަޅުބިލަމަސް ގަންނަ އަގު ކިލޯއެއް 21 ރުފިޔާއަށް މިއަދު ބޮޑުކޮށްފިއެވެ.

މިފްކޯއިން ބުނީ މި ބަދަލު ގެނައީ ބާޒާރުގެ ޑިމާންޑާއި ސަޕްލައިއަށް ބެލުމަށްފަހު މަސްވެރިންނަށް އެކަށީގެންވާ އަގެއް ހޯދައިދީ ދެމެހެއްޓެނިވި މަސްވެރިކަމެއް ބިނާކުރުމަށް ސަރުކާރުން ގެންގުޅޭ ސިޔާސަތުގެ ތެރެއިން ކަމަށެވެ.

އެ ކުންފުނިން ހާމަކޮށްފައިވާ ގޮތުގައި އާ އަގުގައި މަސް ގަންނާނީ ފެލިވަރު ބަނދަރާއި ފެލިވަރު ފިޝަރީޒް ކޮމްޕްލެކްސް އާއި ކުއްޑޫ ފިޝަރީޒް ކޮމްޕްލެކްސް އާއި ގދ. ތިނަދޫ ބަނދަރާއި ލ. މާމެންދޫ ބަނދަރާއި މާލޭ ބަނދަރު އަދި ރ. މަޑުއްވަރީ ބަނދަރުންނެވެ.

ކަޅުބިލަމަހުގެ އިތުރުން ބޮޑުކަންނެލީގެ 10 އާއި 15 ކިލޯއާ ދެމެދުގެ މަސް ކިލޯއެއް 20 ރުފިޔާއަށް ގަންނައިރު 15 ކިލޯއިން މައްޗަށް ބަރުދަން ހުންނަ ބޮޑު ކަންނެލި ގަންނަނީ ކިލޯއެއް 25 ރުފިޔާގެ ރޭޓުންނެވެ.

މީގެ ކުރިން މިފްކޯއިން ކަޅުބިލަމަހުގެ އަގަށް ބަދަލެއް ގެނެސްފައިވަނީ މިދިޔަ ޖޫން މަހުގައެވެ. އެ ފަހަރު ކިލޯއެއްގެ އަގު 20 ރުފިޔާއަށް ޖެއްސީ މާކެޓް ރޭޓާ އެއްގޮތަށް އަގު ދޫކޮށްލައި ކިލޯއެއް 16 ރުފިޔާއާ ހަމައަށް ދަށްވެގެން ދިޔަ ދުވަސްވަރަކަށް ފަހުގައެވެ.